Lassidieđut iskkadeami birra

Lassidieđut 2019 fylkkadearvvašvuođaguorahallama oasseváldiide

Romssa ja Finnmárkku vuosttáš dearvvašvuođaiskkadeapmi mas loaktin ja eallinárvu lea deattuhuvvon lea dál čađaheamen.

Mo loavttát iežat lagasbirrasis? Guđemuš fáktorat váikkuhit du eallinkvalitehtii? Maid don ieš smiehtat iežat dearvvašvuođa birra?

Dáid beivviid bovdejuvvojit sullii 50 000 ássi Romssas (30 000) ja Finnmárkkus (20 000) geat 18 jagi leat deavdán, vástidit gažaldagaid dakkár áššiid birra mat dearvvašvuhtii sáhttet váikkuhit. Fylkkadearvvašvuođaguorahallan mii čađahuvvo Romssas ja Finnmárkkus lea ovttasbargu Álbmotdearvvašvuođainstituhtain ja UiT Norgga árktalaš universitehtain.
Ođđa regiovnnas háliidat láhčit dili buriid eallineavttuide ja eallinkvalitehtii. Danne fertet mii diehtit mo álbmoga dearvvašvuođadilli lea. Jos ollugat vástidit, de lea mis buorre vuođđu vuoruhit doaibmabijuid mat bohtet ássiide buorrin, ja ovddidit buoret álbmotdearvvašvuođa, dadjaba Romssa fylkkaráđijođiheaddji Willy Ørnebakk ja Finnmárkku fylkkasátnejođiheaddji Ragnhild Vassvik.

 

Don gii bovdejuvvot searvat guorahallamii leat válljejuvvon soaittáhagas Álbmotregistara dieđuid vuođul, ja čoahkkádus galgá sihke agi, sohkabeali ja suohkana dáfus ovddastuvvon. Mii sáddet bovdejumi e-boastta dahje SMS bokte. Jearahallanskovi vástádusat leat anonyma ja guorahallan lea dohkkehuvvon Dáhtabearráigeahču bealis.

Romsa ja Finnmárku leat vuosttaš fylkkat mat čađahit dearvvašvuođaguorahallama nationála bagadusaid mielde. Guorahallamii leat ráhkaduvvon liigegažaldagat vai nannet gelbbolašvuođa kultuvrra ja gielladuogáža birra sis geain lea sámi dahje kvena/norgga-suopmelaš duogáš.

Dearvvašvuođaguorahallan

Mii váldit njuolga oktavuođa duinna gii leat válljejuvvon searvat guorahallamii. Earáin lea maid vejolaš logget sisa ja vástidit gažaldagaid, muhto vástádusat eai váldo mielde loahpparaporttas. Ádjána sullii 15 minuhta deavdit jearahallanskovi ja sáhtát vástidit girjegillii dahje davvisámegillii; jierbmetelefovnna, dihtordulbosa dahje PC bokte. Jearahallanskovvi ii leat kvenagillii, ja dan šállošat sihke Romssa fylkkasuohkana ja Finnmárkku fylkkagieldda, ja Álbmotdearvvašvuođainstituhta bealis. Doaivumis dat ii hehtte olbmuid searvamis guorahallamii.

 

Jearahallanskovi deavdimis galggat sisalogget ID-uskkádaga bokte, mii lea sihkkaris goallosteapmi ja bálvalus maid Oslo universitehta lea doaimmahan.

Deaddil dán liŋkka vai beasat searvat guorahallamii:
Deaddil liŋkka vástidit girjegillii: https://nettskjema.uio.no/a/tf-bokmaal
Deaddil liŋkka vástidit sámegillii: https://nettskjema.uio.no/a/tf-samisk

Jos dus leat váttisvuođat sisabeassamiin, dahje eará váttisvuođat guorahallama oktavuođas, de sáhtát váldit oktavuođa:

• Romssa fylkkasuohkana ráđđeaddiin Kristina Forsberg, e-boastta: kristina.forsberg@tromsfylke.no  dahje telefovdna  +47 77 78 82 02
• Finnmárkku fylkkagieldda ráđđeaddiin Britt Somby, e-boastta: Britt.Hjordis.Somby@ffk.no dahje mátketelefovdna  + 47 481 15 269

Skeaŋkakoarta
Logi olbmo válljejuvvojit soaittáhagas sin gaskkas geat gažaldagaid vástidit, ja juohkehaš oažžu 2000 kr. sturrosaš skeaŋkakoartta. Vuoitit almmuhuvvojit fylkkagielddaid neahttasiidduin ja Facebook bokte.

Dehálaš ahte nu ollugat go vejolaš servet
Álbmotdearvvašvuođaguorahallan lea dehálaš vuođđun regionála ja báikkálaš álbmotdearvvašvuođabargui. Mađi eanet vástádusat, dađi buoret máhttovuođđu. Mii sávašeimmet ahte nu ollugat go vejolaš servet ja vástidit gažaldagaid.

 
Servodatovdáneapmi
Buorre dearvvašvuohta ja eallinkvalitehta lea buohkaide hui dehálaš. Nu lea ge hui mávssolaš láhčit dili dearvvašvuođaovddideaddji servodatovdáneapmái. Álbmotdearvvašvuohta ja eallinkvalitehta ii leat dušše olbmo iežas ovddasvástádus danne go sihke biras ja eará dilálašvuođat váikkuhit min eallimii.   Dat guoská buot eallinmuttuide, riegádahttimis bajásšaddamii, joatkkaskuvlačađaheamis bargodillái, ja boaresvuođaváttuid maŋideapmái. Mii diehtit ahte eallinkvalitehta ja loaktin buoridit oktavuođaid ja bajásšaddaneavttuid. Dat váikkuhit maid dasa ahte olbmot birgejit buorebut bargoeallimis ja ahte álbmoga dearvvašvuođadilli buorrána. Danne lea eallinkvalitehta hui dehálaš ođđaáigásaš álbmotdearvvašvuođabarggus.

Buot fáktorat mat min dearvvašvuhtii váikkuhit galget eanet čalmmustahttojuvvot gielddalaš ja fylkkagielddalaš plánain dainna ulbmilin ahte buorebut vuoruhit ja álggahit doaibmabijuid.

 

Vástidanáigemearri lea geassemánu 14.b.2019.

Leat go dus gažaldagat? Mana dán siidui: 2019 Fylkkadearvvašvuođaiskkadeami gažaldagat ja vástádusat

Giitu go veahkehat min buoridit álbmotdearvvašvuođa Romssas ja Finnmárkkus!

Dearvuođaiguin

Willy Ørnebakk Romssa fylkkasuohkana fylkkaráđijođiheaddji     Ragnhild Vassvik Finnmárkku fylkkasátnejođiheaddji
 
Camilla Stoltenberg  Álbmotdearvvašvuođainstituhta direktevra  Magritt BrustadUiT Norgga árktalaš universitehta instituhttahoavda